मी स्वप्न पाहिले
ऐक बाई! मी स्वप्न पाहिले
संत गजानन ! डोळा वो /
नग्न रुप अति विशाल त्यांचे
जणु शंकरची भोळा ! वो // धृ. //
करी धरुनिया चिलीम
आसनी बसले सहज समाधी वो /
उन्मनि त्यांची मुद्रा बघुनी
चरणी मस्तक वंदी वो // १ //
सगुण रुपाचा संत बोलला
कलियुग आता भरले वो /
म्हणुनि सांगतो निरुपाधीने
जीवन कंठा आपुले वो // २ //
नाम भजे जो सदा गजानन !
संकट त्यांचे टळती वो /
पूर्व - जन्मीचे पातक सगळे
दाही दिशांनी जळती वो // ३ //
स्त्री - पुरुषाने व्रत हे घ्यावे
दानधर्म निष्ठेचे वो /
तुकड्यादास म्हणे मग जाती !
पाप मूळ दृष्टीचे वो // ४ //
टिप्पण्या
टिप्पणी पोस्ट करा